ГЭРЛЭЛТЭЭ БҮРТГҮҮЛЭЭГҮЙ ХҮМҮҮСИЙН ДУНДААС ТӨРСӨН ХҮҮХЭД ТЭЖЭЭН ТЭТГҮҮЛЭХ ЭРХТЭЙ

ГЭРЛЭЛТЭЭ БҮРТГҮҮЛЭЭГҮЙ ХҮМҮҮСИЙН ДУНДААС

ТӨРСӨН ХҮҮХЭД ТЭЖЭЭН ТЭТГҮҮЛЭХ ЭРХТЭЙ

Шийтгэх тогтоолын огноо, дугаар: 2023.11.19 №249

Шийдвэрийн төлөв: Хүчин төгөлдөр болсон.

Тойм: 2023.11.19,  №10

Нэхэмжлэгч С нь хариуцагч Д-д холбогдуулан 2018 оны 01 сарын 10-ны өдөр төрсөн охин Э-д хүүхдийн тэтгэлэг гаргуулах тухай нэхэмжлэлийг шүүхэд гаргасан.

Хариуцагч Д нь 2018 оны 01 сарын 10-ны өдөр төрсөн охин Э-г өөрийн төрсөн хүүхэд мөн гэдгийг, мөн хүүхдийн тэтгэлэг төлөхийг хүлээн зөвшөөрсөн болно.

Гэр бүлийн тухай хуульд хүүхэд төрсөнөөр эцэг, эх, хүүхдийн хооронд эрх үүрэг үүсэх бөгөөд гэрлэлтээ бүртгүүлээгүй хүмүүсийн дундаас төрсөн хүүхэд нь гэрлэлтээ бүртгүүлсэн гэр бүлээс төрсөн хүүхдийн адил эрхтэй байхаар, мөн гэрлэлтээ бүртгүүлээгүй эцэг, эхээс төрсөн хүүхдийн ашиг сонирхлыг хохироохыг хориглоно гэж заасан байдаг.

Иймд С, Д нар нь хууль ёсоор гэрлэлтээ батлуулж, хамтран амьдраагүй боловч Д нь охин Э-гийн өмнө эцгийн үүргийг хүлээх тул тэжээн тэтгэх үүргээс чөлөөлөгдөхгүй юм.

Мөн Гэр бүлийн тухай хуульд эцэг, эх нь тохиролцож, гэрээ байгуулан тэтгэлгийг тогтоох боломжийг олгосон байдаг ба хэрэв тохиролцоогүй бол шүүх хуульд зааснаар тэтгэлэг тогтоох юм.

Энэ хэргийн тухайд Д нь тэтгэлэг төлөхийг хүлээн зөвшөөрсөн, С нь хүүхдийн тэтгэлгийг шүүхээр шийдвэрлүүлнэ гэж шаардсан тул шүүх Гэр бүлийн тухай хуульд зааснаар 2018 оны 01 сарын 10-ны өдөр төрсөн охин Э-г 11 нас хүртэл нь тухайн  бүс нутагт тогтоогдсон  амьжиргааны доод түвшингийн 50 хувиар, 11-16 нас  /суралцаж байгаа бол 18 нас/ хүртэл нь тухайн бүс нутагт тогтоогдсон амьжиргааны доод түвшингийн хэмжээгээр сар бүр тэтгэлэг гаргуулан, эцэг Д-гээр тэжээн тэтгүүлэхээр шийдвэрлэсэн байна.

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорлготой болно.

Тойм бэлтгэсэн: Дорноговь аймгийн Замын-Үүд сум дахь сум дундын шүүхийн Ерөнхий шүүгч А.Цэрэнханд

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Шийдвэрийг бүтнээр харах цахим холбоос: Хаалттай